KA NU KA NGAI A NI…

              “Thihna hi nun nei tur a kan kailawn/rahbi hmasa a ni e,” an ti thin… “Thihna hi Pathian ruat a ni e,” te pawh an ti thin….A engamah hi ka hnial lova, ka dodal hek lova….Mahse lei hringfate zingah hian he ‘Thihna’ an chunga a lo thlena tuarthiam ta viau a, ‘Thihna’ in an nunphung, khawsak leh rilru a nghawng loh tunge awm thei ang le….?

Aw, ka chun famchang hnu,

Ngaiin ka zawng zel dawn;

Tawn leh ni her tak ang maw..,

Ka nu ka ngai a ni.

            Chu damdawiin khawhar taka khum Pakhatah chuan ka nu chu engmah hrelo chuan a mu hnar sek sek a, a kut chu ka khal nep nep a. A hmel a dawldangin, a cher tawh em em mai a. Chu damdawiin a kan luh nite chu ka ngaihtuah let neuh neuh a, ka rilru chuan hun chu ka chhuikir a, Thla thum zet mai a lo ral ve ta reng mai. Anatna chu khawvel mihringte finna sang ber pawh in a tihdam theih tawh loh a ni tih hre reng mahila, beiseina ka la nei tlat a, mual minliamsan mai tur hian ka rilru hian a dah phal lova, a dam leh theih nan ka rilru hian Pathian hnenah ka tawngtai mawlh mawlh reng thin….

            Ka rilru chuan chu damdawiin kan luh tan dawn a ka nu beiseina hlim hmel leh damdawiin te a ni bawk a, a natna chu an hrechhuak thuai ang a, reilote kan in enkawl ang a, damtakin kan chhuak leh thuai ang a, tia beiseina kan neih lai a, ka nu hlim hmelte chu ka mitthla ah a lo lang iar iar a, Khang a hlim hmel leh tun a ka nu khum a mu mek hmel te chu ka khaikhin a, tunah chuan a hmel a dawldangin a cher tawh em em a, ka lung hi a awi thei mawlh lo..

           Damdawiin kan luh hma a ka nu thusawi, “ Mate, lungngai reng reng suh u, Pathian in khawvelah hian mithiam tak tak a dah a, chumite chuan min enkawl dawn a ni a, Doctor-te thiamna a sang tawh a lawm, Dam takin kan chhuak leh vat mai dawn a lawm,” a tih ri te chu ka bengah chuan a rawn ri nawn leh tluk tluk a…. Anatna kan hriatchhuah hnu a a tawngkam, “ Mate, Pathian hian engkim hi kan tan a tha tur a a ruat a ni a, Pathian remruat hi keini mihringte lo tih danglam ve ngawt theih a ni hleinem, Kan thih pawhin, kan dam pawhin Pathian ta kan ni a, kan chunga a remruat lo thleng a piang a lawmthiam thei tur a kan in siamrem a ngai a lawm…” a tih te nen chuan a va in persan ta si em..!! Ka nu chuan a chunga Pathian ruat chu a hrethiam a ni mai thei…Kei zawngin tun thleng hian ka la hrethiam thei lo. …”Engvangin nge ka nu kher kher, ” tih hi tun thleng a ka rilru a zawhna thi thei lo a ni.

         “Ka nu kha ka tan hian a hlu a sin….” ka sawi nawn leh dawn.. “Ka nu kha chu ka tan hian a hlu a sin…. ” Khawvel thil engmah hian ka nu hlutna kha aman zo lo…

Naute engmah hrelo, duh hun hun a e a, duh hun hun a zun cheh thin ka nih lai atanga tun hun thleng hian ka nu khan ka taksa peng atanga chhuak reng reng hi a ten lova, Damlo a mahni a zun ek thiar thei lova ka awm pawhin ten miah lo in min thiar sak thin a, a tlaivar a, ka lungaihin min hnem a, ka tah in min thlem a, nun kawng dik a ka kal theih nan nundan mawi tin reng min hrilh a, ka tan hian bang lovin a tawngtai thin….

           Thlasik khawvawt hnuai mah nise, pawn bathlarah ka chhuak phei a, ka nu in min boral san hun a akalna tur lam ni a ka ngaih Van lam ka thlir a, Pathian thilsiam mawi tak tak Arsi te chu an lo lang iarh a, thlasik kawng a zam paw riai bawk a. Damdawiin tual ah chuan ka chhuak phei a, thingbuk pakhat hnuaiah chuan suangtuahna kawm melh melh pah a, ka tan a ka nu hlutna chhuichhuah zawh rual loh leh sawisen rual loh chu mahni chauha chhuizui melh melh tur chuan thuthmun ka rem ta a.

            Ka tana ka nu hlutna hi ka hrechhuak chho zel a, tunhma a ka la hriat ngai reng reng loh thil tam tak, ka lo en liam mai mai thin te khan awmzia a lo neiin, ka nu hmangaihna tawp chin nei lo chuan damdawiin khum laizawl a engmah ti thei tawh lova a mut bem thleng mai chuan hlutna a van nei ngah tak em…!!!

A aw nemin, mi lawm thin kha,

Theihnghilh ni reng ka nei lovang;

Pathian vah bosan mah ila,

Ka nu tawngtaina ka hre reng.

            Ka nu min hmangaihna leh ka tana a in pumpek na chhuichhuah zawh rual loh chu chhui chhuah sen a hnekin ka chhui ril poh leh ka hmuh belh nasa ting mai a lo ni.

            Sana ka han en a, ka rin aiin pawnah chuan ka lo awmrei tawh chu lo niin, ka in ngaihtuah harh thut a, “ ka nu khan mamawh a lo nei ang a,” ka ti a, hmanhmawh takin in chhunglam ah chuan ka tlan lut a, Mahse vanneihthlak takin a lo harh lova, tui tak chuan a lo la hnar sek sek a…..Ka nu hmel dawldang tak leh cher tak chu ka en a, ka tan chuan a cher lova, a hmel a dawldang hek lo, ka tan chuan ka nu hmel tluka tha chu a awm lo…..Ka nu hi a lo van hmeltha tak em….!! Dimte in puan chu ka sin thattir a, a rawn zi trial trial a, “ Ka nu mamawh I nei em..? I zun te a chhuak em.?” ka ti a. Engmah mamawh a neih loh thu leh a zun a chhuah loh thu chu min hrilh a…

           Ka nu ke chu ka vuan a, ka hmehsak neuh neuh a, ka damna tur a a tlan na, mi pangngai ka nih ve theihna tur a hmalam min panpuina ke te chuan chakna reng reng an nei tawh lo tih hriat tak mai hian, an lo vuai zo ta…Vuai chhe zovin, engmah ti thei tawh lo mahse, chu ke aia ke mawi chu ka tan a awm lova, chu ke aia ke hlu chu a awm hek lo…. Lungngaihna leh mangan na luipui zawng zawng min daikai pui a, zan thim leh khawchhe hnuai, he khawvel ram palailenga mi pangngai ang a nung tur a min kalchhuahpuitu ka nu ke chu ka tan hian avan mawi leh zual tak em…..Engtikah nge he thil hi ka khawih phak loh ah a awm ang a, engtikah nge he thil hlu tak hi tawihral tur a phum bo a a awm ang, chutih hun ah chuan keimaha kal ka zir a ngai dawn si a tiin ka ngaituah a, ka mittui a far fap fap a..

           Chutianga, thla thum zet mai in enkawl a, mahni a zun ek thiar thei tawh lo leh na tuar reng reng a hun a hmanna damdawiin chu ‘In’a kan hman hnu chuan khawvel ka nu neih chhun, amah tluk reng reng awm leh ngai tawh lo tur ka nu chuan keini dan zawh rual loh chuan thihna leh natna reng reng tuar leh tawh ngailo tur chuan mual min liamsan ta…. A van na tak em….!! Kei zawngin he khawvelah hian Nu ka nei ve ta lo….

Fam chang hnu ka chun nunnemi,

Kum sangsawm a liam ta fam dairial i channa;

Mahse i dai chuang lo thinlaiah i hlui love,

I sakhming mawi zaiin ka rawn chawi zel dawn e.

           Mite chuan an lungngaih leh mangan ni a tlan luhna tur nu an la nei a, an hlimni leh lawmlai ni a lawmpui tur nu an la nei a, mahni a an din zawh loh chang a dinpui tur nu an la nei a, mahni a an kal theih loh changa kalpui tur nu an la nei a, kei zawngin ka nei ve tawh lo…Lungngaihna a lo thlen in keimahin ka lungngai a, lawmna a lo thlenin min lawmpui tur ka nu a awm ve tawh lo… Mahni a ka kal theih loh a min kalpui tur nu ka nei tawh lova, khawvel ah hian dam khawchhuak tur in keimahin ka vak a, keimahin zanthim ka paltlang a, keimahin thihna hlim kawr ruam zawh a, ka daikai a lo tul taa…..

A thar zel aw nang ngaih lai ka chun nunnem thinlaiah,

I hlui lo, aw.. i hlui lo;

I sakhming thamral mai tur an zawng ka phal lo,

Zai a chawiin ka au zel dawn che.

           Hun leh ni te an liam zel a, ka nu ka ngaihna chu reh a hnehin a zual zel zawk a, ka thinlung ah hian ka nu chu alangfiah tulh tulh thin….Ka nu thlanah chuan ka kal fo a, zan a lo nih leh ka nu in thim a ti ang tiin eng ka va chhit sak a, Ruah a sur leh ka nu a nan hun ang tiin a thlan lung ka va khuh a, chutiang reng eng chuan ka nuin min boralsan a tanga kum thum chung kha chu ka awm thin..mu leh mal ka nei lova, mi a ang mai hi ni hian ka in hre thin….

           Ka nu ka van ngai tak che em.. mifate chuan an lungngaihni a hnemtu tur nu an la nei a sin, an hlim ni a lawmpui tur nu an la nei a sin….Tawngtai sak tu tur nu an la nei a sin..Vawikhat tal I awnem tak khan min tawngtai sak leh teh, vawikhat tal I kut nem tak khan min han kuah leh teh…..Ka nu ka ngai che a sin…..

Min ngai lovin an leng ramthianghlim ah,

Kir an rello an kal zel e;

Lei hi hnuchhawn ram a lo ni,

Parlai tlaini a liam lung a leng e…..